ម្ចាស់បទ «អូនទៅភ្នំពេញ» លោក មួន ម៉ារ៉ា ធ្វើខួបកំណើតកូនប្រុសដំបូង ហៅអ្នកសិល្បៈតិចតួច

សៅរ៍ ១៩ វិច្ឆិកា, ២០១៦ ១៥:៥១

(ភ្នំពេញ)៖ អតីតតារាចម្រៀង ធ្លាប់មានឈ្មោះល្បី ក្នុងសង្វៀនសិល្បៈកាលពីជិត១០ ឆ្នាំមុន លោក មួន ម៉ារ៉ា បានរៀបចំកម្មវិធីខួបកំណើតឲ្យកូនប្រុសដំបូង របស់ខ្លួនគម្រប់ខួប១ឆ្នាំ នៅឯភោជនីយដ្ឋាន V Friend នាយប់ថ្ងៃទី១៨ ខែវិច្ឆិកា ឆ្នាំ២០១៦នេះ ដោយបានអញ្ជើញអ្នកសិល្បៈជិតស្និទ្ធតិចតូច ដើម្បីចូលរួមអបអរសាទរ ខណៈក្រៅពីនោះភ្ញៀវកិត្តិយសចូលរួម សុទ្ធតែជាញាតិមិត្ត និងបងប្អូនខាងប្រពន្ធ។
ម្ចាស់បទ «អូនទៅភ្នំពេញ» លោក មូន ម៉ារ៉ា បានសម្ដែងក្ដីត្រេកអរយ៉ាងខ្លាំង នៅពេលដែលអ្នកសិល្បៈ ក៏ដូចជាបងប្អូនញាតិមិត្ត ផ្ដល់កិត្តិយស ចូលរួមក្នុងកម្មវិធីខួបកំណើតកូនប្រុស របស់ខ្លួន នាយប់មិញនេះយ៉ាងច្រើន បើទោះបីត្រូវរំខាន ដោយដំណក់ទឹកភ្លៀងបន្តិចក្ដី។ លោក មួន ម៉ារ៉ា ថ្លែងប្រាប់អ្នកព័ត៌មានថា លោកបានអញ្ជើញមិត្តភក្តិជាអ្នកសិល្បៈ និងក្រៅរង្វង់សិល្បៈប្រមាណជា១៥តុ ក្នុងនោះក៏មានមន្រ្តីមួយចំនួនផងដែរ ព្រោះតែលោកចង់ជួបជុំសប្បាយរីករាយ ជាមួយគ្នាម្ដង។

លោក មូន ម៉ារ៉ា បន្តថា ខួបកំណើតកូនប្រុសឈ្មោះ ម៉ារ៉ា ធូណាដូ (Mara Thornado) នៅក្នុងថ្ងៃនេះ គឺក្នុងគោលបំណងលើករាសី សុំសិរីសួស្ដី ក្នុងគ្រួសារ និងជាការបង្កើនភាពស្និទ្ធស្នាល ជាមួយមិត្តរួមអាជីព ខណៈដែលការងារសិល្បៈរបស់លោក ក៏កំពុងតែចាប់ផ្ដើមបោះជំហាន បង្ហាញមុខជាថ្មី ក្នុងវិស័យសិល្បៈវិញផងដែរ។
ងាកមកការងារសិល្បៈវិញ តារាចម្រៀង មួន ម៉ារ៉ា បានសង្កត់ធ្ងន់ថា ថ្មីៗនេះ លោកក៏មានបទចម្រៀងថ្មី ចំនួន៣បទ ដើម្បីប្រកួតប្រជែងក្នុងទីផ្សារចម្រៀងដែរ ដោយត្រៀមបង្ហាញឲ្យទស្សនិកជនឲ្យបានឃើញ តាមរយៈកញ្ចក់ទូរទស្សន៍ នៅពេលឆាប់ៗខាងមុខនេះ ហើយក៏ជាសញ្ញាមួយបញ្ជាក់ថា លោកដើរចូលមកកាន់សង្វៀនសិល្បៈ វិញហើយ៕